NBA sariak eta 65 partidako muga

Duela bi denboraldi, telebista audientziak gero eta baxuagoak zirelako, NBAk araudi berria ezarri zuen. Jokalari batek denboraldiko 82 partidetatik gutxienez 65 jokatu behar ditu sarietarako kontuan hartzeko. Neurri horren helburua, hasiera batean, jokalarien parte-hartzea sustatzea eta programatutako 'load management' edo atsedenaren erabilera murriztea zen.

Arazo galanta da. Izar handien karrerak 82 partiduak jokatzen badituzte, urte pare bat laburragoak izango lirateke. LeBronen kasuan, adibidez, argi dago. Eta atseden hartzeak ez luke txarra izan behar, ez kirolarentzat, ez kirolariarentzat. Baina harmailetan dagoen jendeak ez du berdin ikusten. Sekulako dirua ordaintzen dute estadiora joateko eta ez dituzte bigarren mailako jokalariak pistan ikusi nahi denbora guztian.

Gainera, jokalari askok, lesioengatik edo taldearen kudeaketa estrategikoengatik, ez dute muga hori gainditu, eta horrek bere izarraren eta lanaren aitortza baldintzatu du. Partidu kopuruarekin polemika dago. Zergatik 65 eta ez 55? Eta jokatutako guztia primeran egiten bada, gutxi bada ere, zergatik ezin da MVP edo Defentsa Jokalari Onenaren saria irabazi. Horrek ere injustizia moduko bat sortzen du zale eta aditu askorentzat.

Entrenatzaile eta analista batzuek salatu dutenez, arau berriak ez du kontuan hartzen egutegiaren eta bidaiaren kargaren ondoriozko atsedenaren beharra. Jokalarien osasuna eta iraupena arriskuan jar daitezke, sari baten aukera ez galtzeko. NBAk araudi hau berrikusi beharko du orekaren bila: parte-hartzea sustatu bai, baina ez kalitatearen kontura.

Aurten 65 partida jokatu ez dituzten jokalari esanguratsuen artean hauek daude: Joel Embiid, Jimmy Butler, Kawhi Leonard, Kristaps Porziņģis, Tyrese Haliburton, LaMelo Ball, Jaren Jackson Jr, Zion Williamson, Karl-Anthony Towns, Devin Booker edo Luka Doncic.

2024-2025 denboraldiko jokalari guztien % 38k ez du 65 partidako muga bete. Horrek esan nahi du ia 4 jokalaritik batek baino ezingo duela sari indibidualik eskuratu.

65 partida edo gehiago jokatu dituztenen artean, Shai Gilgeous-Alexanderrek (Oklahoma City Thunder) 32,7 puntu sartu zituen partidako eta Thunderrek ligako errekorrik onena lortu zuen (68-14). Nikola Jokin (Denver Nuggets): 29,6 puntu, 12,7 errebote eta 10,2 asistentzia batez beste, hiruko eta biko batez bestekoarekin. Giannis Antetokounmpo (Milwaukee Bucks): 30,4 puntu, 11,9 errebote eta 6,5 asistentzia. Jayson Tatum (Boston Celtics): 29,7 puntu, 7,9 errebote eta 5,9 asistentzia.

• Temas
• Euskera
• Harmailatik (Sergio Eguia)