Ikasle atzerritarrak integratzen

Hezkuntza Sailean «kezkatuta» daude bertako eta atzerriko ikasleen arteko desberdintasun akademikoengatik. 2019 eta 2023 urteen arteko azken Ebaluazio Diagnostikoak erakusten du arrakala handitu egin dela ia konpetentzia guztietan, bai LHko 4. mailan, bai DBHko 2. mailan. PISA txostenak ere alde handiak erakusten ditu.

Argi dago atzerritarren integrazioa dela erronka nagusietako bat. Tolerantzia, aniztasuna eta bizikidetza-balioak sustatzeko ez ezik, iritsi berri horiek gure artean duintasunez bizi daitezen ere bai.

Helburu hori betetzen ari gara? Argi-ilunak daudela uste dut. Alde batetik, hezkuntza-uzte goiztiarraren tasarik baxuena dugu Estatuan ( % 5,5). Horrek esan nahi du ia ikasle guztiei eskaintzen dizkiegula hezkuntza-aukerak. Baina nolakoak dira aukera horiek? Euskadiko Eskola Kontseiluaren arabera, Lanbide Heziketako oinarrizko graduek eta erdi-mailakoek jasotzen dituzte atzerritar gehien. Batxilergoak, aldiz, kopururik txikiena du. Zergatik aukeratzen dute hainbeste bide hori? Erabaki librea al da benetan?

La Vanguardia egunkariak Andreas Schleicher PISA txostena antolatzen duen ELGAko hezkuntza-zuzendariari egindako elkarrizketa batek hainbat gako eskaintzen dizkigu arlo horretan. Adituak dioenez, «badakigu atzerriko ikasle bat herrialdera iristen denean eskolak bi urte dituela bertakoen mailan kokatzeko, edo gero zaila izango dela hori lortzea. Euskarriarekin egin daiteke. Horretarako, beharrezkoa da gela horietan irakasle onenak izatea, ikaskuntza-gabeziak identifikatzeko eta mentore gisa jarduteko». Eta gehitzen du garrantzitsua dela «zehaztea ez dela immigrazioa, jatorri soziala baizik» maila akademikoan eragin handiena duen faktorea. Gogoratu behar dugu aurten inoiz baino ikasle atzerritar gehiago etortzen ari direla ikasturtean zehar.

Schleicher kataluniako kasuari buruz ari da elkarrizketan. Baina, nola egiten dugu EAEn? Hemen proiektu piloto bat daukagu sare publikoan ezarrita, EUSLE proiektua. 39 ikastetxek eta 440 ikaslek parte hartzen dute. Funtsean, murgiltze gelak dira, euskara ikasteko, nagusiki. LHko 4., 5., 6. eta DBHko 1. eta 2. mailako ikasleekin egiten da. Bi edo hiru urteko programa da eta zuzendaritza taldea, irakasleak eta tutoretzaren partaidetza dira gakoak.

Zein izan da emaitza? Euskadiko Eskola Kontseiluaren arabera, programa honetako 503 ikasletatik (altak eta bajak kontuan hartuta) %31 (156) aurkeztu dira A2 maila lortzeko. Horietatik 79k gainditu dute.

Hau da, kasu onenetan, DBHko 2. mailan, hiru urtez zehar EUSLE programaren laguntza jaso duen ikasle batek euskarazko A2 maila lortzen du. Eta, orain arte, 503tik 79k baino ez dute lortu. Maila hori nahikoa al da D ereduko klaseak jarraitzeko? Ezetz esango nuke. Bestalde, egia da programak baduela zerbait oso ona: integrazioaren eta alderdi emozionalen ikuspegitik, aurrerapenak nabarmenak dira. Baina, nolanahi ere, ziur al gaude tresna guztiak ematen dizkiegula ikasle horiei beren maila akademikoa gara dezaten?

• Temas
• Euskera
• Zorrozkailua